Kashtaga qiziqishim avloddan-avlodga o‘tgan bo‘lsa kerak

Mahliyo Mannonovada kashtaga bo‘lgan qiziqish haqiqatdan ham meros orqali shakllangan. Uning oilasida buvi, onasi va xolalari tikuvchilik va kashtachilik bilan shug‘ullangan. Bu faoliyat oddiy hunar emas, balki avloddan-avlodga o‘tib kelayotgan an’ana bo‘lgan.

Asli Farg‘ona viloyatidan bo‘lib, Shahrisabz shahriga kelin bo‘lgach, Mahliyo ushbu hududga xos kashtachilik an’analari va “kashta” san’atini chuqurroq o‘rganadi. Aynan shu yerda u kashtaning naqadar boy madaniyat ekanini, naqshlar, bezaklar va uslublarning xilma-xilligini anglab yetadi hamda kashtachilikni o‘zining professional faoliyat yo‘nalishiga aylantiradi.

Mahliyo Mannonova o‘z ishida tarixi 3000 yildan ortiq bo‘lgan qadimiy naqshlardan foydalanadi. Bugungi kunda u qadimiy va milliy namunalarga asoslangan holda turli mahsulotlarni ishlab chiqarmoqda. Ular orasida qalpoq, hamyon, etik, shippak, turli sumkalar va kostyumlar mavjud.

U 14 yildan buyon tadbirkorlik faoliyati bilan shug‘ullanib kelmoqda. Shu vaqt davomida uning rahbarligida ishlab chiqarilgan mahsulotlar O‘zbekiston chegarasidan tashqariga chiqib, bugungi kunda Turkiya va Yevropa davlatlaridagi mijozlarga yetkazib berilmoqda.

Faoliyatining muhim yo‘nalishlaridan biri – ta’limiy ishlar hisoblanadi. Mahliyo Mannonova institut va universitet talabalariga “ustoz–shogird” an’analari asosida kashtachilikni o‘rgatib kelmoqda. Bu orqali yoshlar hunarni egallab, daromad topish imkoniyatiga ega bo‘lmoqda. Natijada kashtachilik nafaqat madaniy meros, balki iqtisodiy barqarorlik manbai sifatida ham shakllanmoqda.

Video: Hamroh - Xotin-qizlar tadbirkorligini qo‘llab-quvvatlash kompaniyasi

Uning tadbirkorlik yo‘lida Hamroh kompaniyasining qo‘llab-quvvatlashi muhim rol o‘ynadi. Aynan Hamroh ko‘magida Mahliyo Mannonova o‘zining shaxsiy brendini ochishga muvaffaq bo‘ldi hamda faoliyatini yangi bosqichga olib chiqdi – ishlab chiqarishni tizimlashtirdi va milliy kashtachilik asosida to‘laqonli brend shakllantirdi.

2024-yilda uning tadbirkorlik sohasidagi hissasi davlat miqyosida e’tirof etilib, Mahliyo Mannonova “Faol tadbirkor” ko‘krak nishoni bilan taqdirlandi.

Bugungi kunda uning faoliyati bir nechta yo‘nalishni o‘z ichiga oladi: an’anaviy hunarni saqlash, zamonaviy ishlab chiqarishni rivojlantirish, yoshlarni kasbga o‘rgatish va milliy madaniy merosga asoslangan barqaror tadbirkorlik loyihasini shakllantirish.

«Kashtaga qiziqishim avloddan-avlodga o‘tgan bo‘lsa kerak», – deydi Mahliyo Mannonova. Uning hayot yo‘li esa oilaviy an’ana qanday qilib professional faoliyat, shaxsiy brend va barqaror biznesga aylanishi mumkinligini amalda ko‘rsatib bermoqda.